LAOAG CITY – Napilaanen ti kaso a reckless imprudence resulting to homicide ni Mr. Randy Ramos a taga Barangay 1 iti ili ti Solsona.
Daytoy ti inbatad ni Police Major Carlo Abing, ti chief of police iti ili ti Sarrat.
Ni Ramos ti nangiturong iti kotse a dinungpar ni Sang Bayan member Jose Martin Jr. iti met laeng ili ti Solsona ngem napasamak ti insidente iti paset ti Barangay Cabuloan iti ili ti Sarrat.
Inpakaammo ni Abing a kalpasan a napilaan ti kaso ni Ramos ket dagus met laeng a nakapagpiyansa iti 60 ribo a pisos para iti temporaryo a pannakawaya-waya na.
Inbatad ni Abing a naipursige ti pannakaipila ti kaso kalpasan a saan a nakapaginnurnus ti pamilya ni Ramos ken ti pamilya Martin.
Maipalagip a napasamak ti desgrasya iti Sitio Cabuloan, Brgy. 21 San Marcos iti ili ti Sarratno sadinno a kabayatan nga agpakannigid ti kotse a sumrek iti barangay road kalpasan a pinalabas na ti maysa a tricycle ket kelaat a naidungpar ti motorsiklo ti biktima iti likod ti kotse.
Dagus a naitaray ti konsehal iti ospital ngem pimmusay bayat a maag-agasan.
