LAOAG CITY – Inlawlawag ni Police Major Rommel Ramos, ti chief of police ti PNP-Bacarra a pilaan da met ti kaso ti driver ti kotse a nagluganan dagiti dua a maipagarop a mangngilot a residente iti Candon City, Ilocos Sur ken naglibas a simrek ditoy probinsya.
Segun kenni Ramos, naglabsing ti driver iti maipatpatungpal a protocol ken gapo ti panangilugan na kadagiti dua nga indibidwal a naglibas.
Kunana a naamoan da nga iligal a simrek dagiti dua a mangngilot idi adda ti napasamak nga insidente kabayatan ti checkpoint.
Ummuna iti daytoy, kunana nga idi manarimaan ti panagcheckpoint da ket pinara da ti motorsiklo ngem kellaat a nagsardeng isut gapo na nagsardeng met ti sumarsaruno a kotse a nagluganan dagiti maseknan.
Naamoan nga iti panagsardeng ti kotse ket nadungpar met ti sumarsaruno a lugan daytoy rason a nairaman pay ti motorsiklo nga adda iti sangwanan da.
Inbaga na nga idi dinamag da no adda ti dokumento dagiti maseknan a taga-Ilocos Sur ket awan ti naipakita dagitoy isut gapo na nga inpakaammo da iti PNP-Badoc.
Kabayatanna, naglabasen ti 12 nga oras a mabalin a panagtalinaed dagiti maseknan iti kustodyar da.
Maipalagip nga inbatad ni Police Capt. Joseph Tayaban, ti chief of police iti ili ti Badoc a naduktalan ti pannakastrek dagiti dua a lalaki nga agtawen ti 60 ken 71 ditoy probinsya ken saan a nagna dagiti maseknan iti border control iti ili ti Badoc ken nagna dagitoy iti maar-aramid a mini-dam iti Sinait, Ilocos Sur.
