LAOAG CITY – Inbatad ni Police Corporal Louie Ballesteros iti PNP iti ili ti Solsona a nagtalinaed iti kustodyar da ti driver ti motorsiklo a nakikalubbunan ti babai a pimmusay iti paset ti Barangay Manalpac iti nasao nga ili.
Nabigbig ti biktima a ni Lydia Daguro, agtawen ti 49, balo ken residente iti Brgy. Bagbago iti ili ti Solsona idinto a ti driver ti motorsiklo ket ni Wilson Fiesta, agtawen ti 54, backhoe operator ken residente iti Brgy. Manalpac iti met laeng nasao nga ili.
Inlawlawag ni Ballesteros a kabayatan ti panagdalyasat da Daguro ken Fiesta ket immovertake kadakuada dagiti agkabsat a naglubbon ti motorsiklo.
Iti panagsardeng ti motorsiklo a nagluganan ti biktima ket ditoyen a maipagarop a nagrangasan a kinabkabil dagiti agkabsat nga isuda Jerwin Peralta, agtawen ti 19 ken Aprilyn Peralta, agtawen ti 18, agpada a taga Barangay Manalpac iti nasao nga ili.
Naamoan a dagiti agkabsat ket annak ti maibagbaga a nobyo ti biktima.
Segun pay ken ni Ballesteros, kalpasan a nakabkabil ni Daguro ket naglugan iti motorsiklo nga inturong ni Fiesta, ngem kalpasan ti sumagmamano a kanito ket natennag daytoy.
Naitaray ni Daguro iti Rural Health Unit iti ili ti Solsona kalpasan na naiyakar iti Dingras District Hospital a ditoy a naideklara a dead on arrival.
Desidido met ti pamilya ti biktima a pa-otopsiya ti bangkay na tapno maamoan no ania ti pudno a nakatayan na.
