LAOAG CITY – Nagtalinaed iti Intensive Care Unit (ICU) ti biktima ti napasamak a desgrasya iti Barangay 1 iti ili ti San Nicolas kalpasan a naputol ti dua a saka na kalpasan a naligayan ti maysa a dump truck.
Iti naiyuswat nga imbestigasyon, agpapaamianan a direksyon ti dump truck nga inturong ni Arnel Layugan, agtawen ti 59, naasawan ken residente iti Brgy. 11 Catgatagen iti ili ti Banna.
Naamoan nga adda iti akin-kannawan a shoulder ti kalsada ti mio motorcyle nga inturong ni Rommel Andres, agtawen ti 25 ken residente iti Brgy. San Cristobal iti ili ti Sarrat.
Apaman a daldalyasaten dagiti dua a behikulo ti national highway ket nag-overtake ti motorsiklo ket dita a nadungpar na ti maysa met laeng a motorsiklo nga inturong ni Marc Marcos, agtawen ti 23 ken residente iti Brgy. 16 iti ili ti San Nicolas.
Gapu iti daytoy, na-slide ti driver ti mio ken naipasirok iti likod ti truck rason a naligayan ti saka na.
Nagtalinaed iti kuerpo ti pulisya ti driver ti truck ken manamnam nga agsarita daytoy ken ti pamilya ti driver ti mio.
