LAOAG CITY – Inpakaammo ni Police Capt. Randy Damo, ti chief of police iti ili ti San Nicolas a nagtalinaed ti driver ti NMAX motorcycle iti Mariano Marcos Memorial Hospital and Medical Center iti ciudad ti Batac gapu ta dumalan pay iti operasyon kalpasan a natukkol ti takyag na kalpasan ti panagdinnungpar da iti maysa a tricycle a nakatayan met ti driver na iti paset ti Brgy. 7, San Miguel iti nasao nga ili.
Immunan a binigbig ni Damo ti pimmusay a nangiturong ti tricycle a ni Rodrigo Asuncion, agtawen ti 59, naasawaan, residente iti nasao a barangay idinto a ti nagmaneho ti motorsiklo a Yamaha NMAX ket ni Marck Angelo Arcaperlas, agtawen ti 27, naasawaan ken residente ti Sitio Vicencio, Taleb, Bantay, Ilocos Sur.
Inlawlawag ni Damo a basar iti imbestigasyon da, agpapalaud ti tricycle ken iti panag-left turn na ket isu metten ti pannakadungpar ti agpapadaya met a motorsiklo iti sidecar na.
Gapu iti daytoy, napattog ti tricycle a nagresulta iti pannakaitupar ti ulo ti driver iti semento ken napandagan pay ti sidecar na.
Mainaig iti daytoy, inpakaammo ni Damo nga ita nga aldaw ti pannakaisayangkat ti inisyal a panagsasarita ti dua a partido no sadinno a mangipatulod ni Arcaperlas ti mangibagi kenkuana tapno makisarita iti pamilya ni Asuncion.
Kabayatanna, kuna ni Damo nga awan ti nakainom ti nasanger kadagiti dua a driver.
