LAOAG CITY – Nabigbigen dagiti dua a bodyguard ni ABC President Mark Adrian “Macky” Barba a karaman a napaltu-paltogan iti Brgy. 22 iti ili ti San Nicolas.
Basar iti San Nicolas Municipal Police Station, nabigbig dagiti dua a bodyguard nga isuda Lord Wayne Bautista Menor, agtawen iti 26, awanan asawa, residente ti Brgy. 12 San Cayetano iti ili ti San Nicolas ken ni Raffy Agraan Ulep a residente ti Brgy. 6 San Juan Bautista iti nasao met laeng nga ili.
Naammoan a ni ABC President Barba ken ti maysa kadagiti bodyguard-na a ni Ulep ket agpada dagitoy a dead on arrival idinto a pimmusay ni Bautista kabayatan a matamtaming iti ospital.
Mainaig iti daytoy, segun ken ni Mr. Manuel Guira, Traffic Enforcer, adda ti sumagmamano a tama ti bala ti paltog a simrek iti maysa a pasdek negosio no sadinno nga adda ti maysa a lalaki a manarimaan a matmaturog kadayta a gundaway.
Kunana a dagus a naglemmeng iti sirok ti agdan ti maseknan nga indibidual gapu metten iti panagdanag ken panagamakna iti napasamak a pammaltog.
Kabayatanna, manarimaan pay laeng ti iwaywayat nga imbestigasion dagiti otoridad maipanggep iti nasao nga insidente.
Immuna iti daytoy, pimmusay ni ABC President Barba pakairamanan dagiti dua a bodyguard-na kalpasan a pinaltu-paltogan dagiti saan pay a nabigbig a suspek iti sango ti Pamulinawen Hotel iti Brgy. 22 iti ili ti San Nicolas.
