LAOAG CITY – Napilaan ti dua a kaso ni John Christopher Luz y Tugade, agtawen ti 29, naasawaan ken residente iti Brgy. Bungro iti ili ti Pinili.
Daytoy ket mainaig iti panangbakal na ti bato iti trcicyle driver a ni Alvin Bernade y Alperez, agtawen ti 32, baro ken residente iti Brgy. Camanggaan, ditoy siudad ti Laoag.
Sanguen ni Luz ti kaso a Frustrated Murder ken Multiple Attempted Murder kalpasan a naipila daytoy iti Provincial Prosecutor Office itay kallabes.
Maipalagip a kadua ni Luz ni Edimar Paraluman Tugade idi napasamak a panagbato iti Brgy 16 San Marcos iti ili ti San Nicolas.
Namunganay ti insidente gapu ti panangala dagiti dua a babbai nga agpapaay iti pagiinoman iti nasao a barangay.
Inlawlawag ni Police Major Paul Benedict Parado, hepe ti PNP San Nicolas a nakurang ti pagbayad da Luz kenni Tugade kadagiti ininom da rason nga innala dagiti babbai ti cellphone da.
Dimteng ni Bernabe a nakalugan ti tricycle tapno sunduen na dagiti babbai ngem bayat iti panagawida.
Kinamat dagiti suspek ken target da a bakalen ti bato dagiti babbai ngem natamaan ni Bernabe.
Maipagarup nga adda ti natukkol a paragpag ni Bernabe gapu ti pannakabakal na ti bato nga arig gemgem ti kadakkel na.
