LAOAG CITY – Sumango iti agsusukot a kaso dagiti suspek iti napasamak a pammaltog iti sango ti Mormons Church iti paset iti Barangay Brgy. 23 ditoy ciudad ti Laoag.
Nabigbig dagiti suspek a da Mark Dave Menor y Aliga, agtawen iti 27 ken ti agtawen iti 17 nga estudyante, agpada a residente iti Barangay 29 ditoy ciudad idinto a ti biktima ket ni Bel King Rangasan Tango, agtawen iti 24, naasawaan ken residente iti Barangay 20 ti nasao a ciudad.
Iti imbestigasyon, adda ti inasitgan ti biktima a babai iti sangwanan ti balay ti ikit na iti Brgy. 21 ngem adda ti kellaat lattan a nangpang-or ti ulo na.
Gapu ti daytoy, nagtaray ti biktima a napan iti motorsiklo na kagiddan ti panangpataray na iti daytoy ngem kinamat dagiti suspek a nakalugan met laeng ti motorsiklo.
Naamoan a kabayatan ti panangkamkamat dagiti suspek ti biktima ket pinaputukan da daytoy ti paltog ngem saan a natamaan, ken idi nadanun da ti batog ti Honda Prestige iti Bacarra Road, ket pinaltogan manen ni Menor ti biktima a nangitonda ti pannakaslide na.
Nupay kasta, dagus a nakataray ti biktima ken napan nagkamang iti kabalbalayan.
Iti panagresponde dagiti otoridad ket natiliw da dagiti suspek ken nakumpiskar da iti ikot da ti caliber 38 Revolver nga addaan ti dua a bala para ti caliber 38, dua nga empty shells ti caliber 38 ken ti motorsiklo nga inusar dagiti suspek.
Nagtalinaed iti kustodyar ti PNP dagiti suspek ken sumango da iti agsusukot a kaso kas ti frustrated homicide, panaglabsing iti Republic Act 10591 wenno Comprehensive Firearms and Ammunition Regulation Act ken ti Election Omnibus Code.
