LAOAG CITY – Manamnama a mapilaan ti kaso a frustrated murder dagiti dua a suspek iti pammaltog iti Brgy. Cali iti ili ti Dingras.
Daytoy ti inpakaammo ni P/Capt. Roi Manuel Ordonio, Hepe ti Dingras Municipal Police Station.
Segun kenkuana, basar iti inwayatda nga imbestigasion iti panagrebyuda iti ala ti Close Circuit Television camera a nakaimuntar iti maysa a gasoline station iti Brgy. Parado iti ili ti Dingras ken iti sakupen ti Brgy. Valdez iti ili ti Marcos.
Inbatadna a nabigbig dagiti dua a suspek nga isuda Shaun Alexis Pillos y Sta Monica, agtawen ti 21, awanan asawa, Physical Therapy student ken RB Nuval y Martin, agtawen ti 26, naasawaan, Sangguniang Bayan Member iti ili ti Marcos nga agpada a residente ti Brgy. Valdez iti ili ti Marcos.
Inlawlawagna a naarestar dagiti nasao a suspek iti pagtaengan da Pillos a masarakan iti Brgy. Valdez iti ili ti Marcos.
Maipalagip a sinurot dagiti suspek ti biktima a ni John Restie Decamos y Mallari, agtawen ti 19, residente ti Sitio Malasin iti Brgy. Lanas iti ili ti Dingras ket ditoy a pinaltoganda iti naminsan a daras iti akin-kannawan nga abaga ti biktima a dagus met a naitaray iti Gov. Roque B. Ablan Sr. Memorial Hospital ditoy siudad ti Laoag.
Immuna iti daytoy, narekobre iti nakapasamakan ti insidente ti maysa a pedaso ti deformed fire cartridge ti Cal 45., maysa a pedaso ti bull cup ken maysa nga unit ti cellphone.
Kabayatanna, narekobre pay dagiti otoridad ti uppat a pedaso ti live ammunition ti cal. 45, tallo a pedaso ti Fired Cartridge Cases ti cal. 45 ken maysa a pedaso ti fired bullet.
