LAOAG CITY – Inrakurak ni Police Capt. Roi Manuel Ordonio, ti chief of police iti ili ti Dingras a winaya-wayaan dan dagiti dua a suspek ti pammaltog iti Barangay Cali iti ili ti Dingras.
Daytoy ket kalpasan nga adda ti inparuk-at a release order manipod iti piskalya probinsyal.
Maipalagip a ti biktima ket ni John Restie Decamos y Mallari, agtawen ti 19, residente ti Sitio Malasin iti Brgy. Lanas iti ili ti Dingras idinto a dagiti dua a suspek ket isuda Shaun Alexis Pillos y Sta Monica, agtawen ti 21, awanan asawa, Physical Therapy student ken RB Nuval y Martin, agtawen ti 26, naasawaan, Sangguniang Bayan Member iti ili ti Marcos, agpada dagitoy a residente ti Brgy. Valdez iti ili ti Marcos.
Immunan a kinondenar ni Atty. Edito Balintona, legal counsel ti maysa kadagiti suspek ti proseso ti Philippine National Police (PNP) iti panangtiliwda iti kliyentena ken ti kadwa na.
Segun kenkuana, saan a sinurot ti Philippine National Police ti umno a panagarestar gapu ta awan ti nalawag ken positibo a pakabigbigan dagiti suspek, rason a saan a maiyannatop a “warrantless arrest” ti naipakat kadagitoy.
Inlawlawagna pay a ti “hot pursuit” ket kasapulan nga addaan ti sigurado a pakabigbigan ti akusado tapno maibaga a lehitimo ti tignay ti nailian a pulisya.
Innayon ni Balintona a dinakamat ti hepe a ti laeng tattoo iti ima ken nakamotorsiklo ti nangibasaran da ngem saan a maibaga ti biktima ti eksakto a langana.
Kabayatanna, iti panangadal ti piskalya dagiti ebidensya nga indatag ti Philippine National Police ken ti kampo dagiti suspek ket napaneknekan nga illegal ti panangarestar kadakuada ti nailian a pulisya.
