LAOAG CITY – Addan iti natalged a kasasaad dagiti dua pay a biktima ti desgrasya a napasamak idiay Barangay Saud, Badoc, Ilocos Norte idi rabii ti Mayo 23.
Nagtalinaed pay laeng iti ospital dagitoy a nabigbig nga isuda Martin Aganon ken ni Michael Vergara.
Segun iti PNP-Badoc, saan da pay a nakasarita dagiti pamilya dagiti pimmusay a Sherwin Pagatpatan, residente iti Barangay Madupayas; Aristotle Semana ken ni Scarlet Vergara, ti asawa ni Michael.
Maipalagip a bayat nga agpadaya a direksyon da Pagatpatan iti kurbaan a paset ti kalsada iti nasao a barangay ket nakadinnungpar da ti nagluganan ti agasawa a Vergara.
Rumrumuar nga immagaw ti linya ti TMX a nagluganan da Pagatpatan a rason ti panagdinnungpar ti dua a motorsiklo.
