LAOAG CITY – Napilaanen ti kaso kriminal ni Mr. Weigan Mendez, security aide ni Vice Mayor Amador Victor Racimo Jr. iti ili ti Vintar gapu iti maipagarup a nagprobokar na iti sango ti munisipyo itay kallabes.
Inbatad ni Mayor Larissa Foronda iti nasao nga ili a naipila ti reklamo kontra ken ni Mendez babaen ti regular filing gapu ta saanda nga inpila a dagus.
Inbaga ti mayor nga awan ti poder na a mangikkat ken ni Mendez gapu ta ti bise mayor ti nangala nga agtrabaho kenkuana.
Nupay kasta, kuna ni Foronda a masapol a matratar ti inaramid ni Mendez iti Disciplinary and Separation Board ((DSB) tapno mapatawan ti sanction.
Maipalagip a nagprobokar ni Mendez iti sango ti munisipyo ken kinariri na pay ni Mr. Jolan Gapuzan a security aide ni Mayor Foronda.
Malaksid iti daytoy, maipagarop a dinungpar pay ni Mendez ti service vehicle ti mayor iti ili ti Vintar.
Immunan nga inpalawag ni Mendez iti Bombo Radyo Laoag a naaramid na laeng ti nagprobokar gapu iti nakaro a pungtot na ken ni Gapuzan.
Inkalintegan ni Mendez a pabpabasolen ni Gapuzan nga adda dagiti ik-ikutan na a ladawan dagiti maipagarop a babai ni dati a Mayor Joe Foronda iti nasao nga ili.
Nupay kasta, naglikudan ni Mayor Foronda ti alegasyon ni Mendez.
Kabayatanna, inbaga ni Vice Mayor Racimo a nagpalawag kenkuanan ni Mendez ngem saanna pay laeng a pinastrek gapu ta manarimaan ti imbestigasyon na mainaig iti inaramid ti security aide na.
