LAOAG CITY – Inpetteng ni Engr. Joel Mateo iti City Engineering Office a saan na a dinawat ti 15,500 a pisos kenni Mr. Danny Labao para iti pannakaiproseso ti building permit ti negosyante.
Segun kenni Mateo, idi manarimaan ti panagpatakder da Labao ken ni Eric Bareng ket pinagsardeng na gapo ta kasapulan da pay laeng a mangala ti building permit.
Kunana nga idi inisyuan na ti Notice of Violation dagitoy ket nagturong ni Labao iti pagtaengan ni Mateo tapno agpatulong ken inbaga na met amin a kasapulan a dokumento.
Inlawlawag na a ti nasao a kantidad ket inted kenkuana ni Labao kas bayad iti plano, agpirma nga inhinyero ken ti pannakaiproseso ti papeles a maisubmitir iti Fire Dept., zoning ken iti opisina da.
Inbatad na nga innala ni Labao dagiti amin a kasapulan a dokumento ngem ti laeng kurang na ti nagbayadan wenno mangipaneknek a nabayadan ti amilyar idi April 2022.
Inpalgak na a ni met laeng Labao ti nangibaybayag iti daytoy gapo ta saan met nga aprubaran ti City Planning ti papeles a mapan iti fire dept no awan ti nagbayadan ti amilyar.
Ummuna iti daytoy, inbatad ni Labao a nagkamang kenni Mayor Michael Marcos Keon tapno maireklamo ni Engr. Mateo kalpasan a naduktalan na nga awan ti building permit ti establisyimento na ditoy siudad.
Kuna na a daytoy ket iti baet a nagtalek ken ni Engr. Mateo nga isu ti nagkari a mangileppas kadagiti kasapulan na kasukat ti 15,500 a pisos.
Inpakaammo ni Labao nga itay napan a tawen pay laeng nga inted na ti kantidad a dinawat ti inhinyero rason a kampante a naileppas ti building permit na.
Nu pay kasta, inbunannag ni Labao nga apaman a napan nangala ti certificate of occupancy ket dita a naduktalan na nga awanan pay ti building permit ti establisyimento na.
Inbatad na a gapu iti daytoy ket mamulta isuna ngem kayat na a ti inhinyero ti agbayad kalpasan a saan a napatgan ti inkari na kenkuana.
Immuna iti daytoy, kuna ni Labao a namin ado a daras a tinawatawagan na ni Engr. Mateo ngem apaman a nakakita ti wagas a makasarita na daytoy ket maipagarup nga inpetteng ti inhinyero a saan nga isuna ti nasken nga agbayad ti multa.
Naamoan a maipawil kadagiti agpapaay iti local a gobierno ti agdawat ti uray mano a kantidad manipod kadagiti kliyenta da.
Kabayatanna, gapu ta saan a nadanun ni Labao ti inhinyero iti opisina na kageddan iti panagturong ken Mayor Keon ket manamnama nga agkadua da iti mayor a mangsango kenkuana intuno lunes.
