LAOAG CITY – Inbatad ni Pl/Maj Reginaldo Dalipias Jr., Hepe ti Philippine National Police iti ili ti San Nicolas nga adda ti naawatda a report a nagbekkel ti maysa a Grade 9 student iti mismo uneg ti pagtaenganda iti Brgy. 6 iti ili ti nadakamat nga ili.
Segun kenkuana, agtawen ti biktima iti 15, lalaki ken residente iti nasao a barangay.
Basar iti naiwayat nga imbestigasion, nangipatulod ti mensahe ti biktima iti mestra na nga agpakada a saan pay laeng a sumrek iti pagadalan gapu iti marikriknana.
Mainaig iti daytoy, ket adda pay ti maipagarup a nangipatulod pay ti mensahe ti biktima iti mestra na a kayat na kettelen iti bukodna a biag ngem saan daytoy a dagos a nakita ti mestrana.
Gapu iti daytoy, idi makita ti mestra ti mensahe nga inpatulod ti biktima ket dagosna a tinawagan ti nagannak ti estudiante.
Innayon ni Dalipias a dagos a binaon ti ina ti bayaw ti biktima idinto a nakitana a nakabitin ti estudiante iti uneg ti kuwarto na.
Naammoan nga irekreklamo ti biktima nag adda dagiti mangbul-bully kenkuana iti pagadalan no sadinno saludsuden daytoy ti mestrana ket maipagarup nga awan ti ibagana.
Kabayatanna, rumrummuaar iti imbestigasion a sumangsango iti problema ti pamilia ken adda ti personal a problema ti biktima no sadinno addan ti immuna a pananggandatna nga agpakamatay ngem nalappedan ti inana.
Iti agdama, ket agtutuloy ti panangiwayat ti Philippine National Police iti ili ti San Nicolas iti naan-anay nga imbestigasion maipanggep iti nasao a banag.
