LAOAG CITY – Inyistorya iti Bombo Radyo Laoag ti Grade 8 student iti Dingras National High School no kasano ti pannakabagkong na babaen iti Grade 9.
Segun iti biktima, manarimaan ti panagmeryenda na idi inyaban isuna ti maysa kadagiti kadua ti suspek ken ditoyen a ginuyod ti suspek ti jacket na ken binagkong na ti balisong ken arig na inkuti na pay daytoy.
Kunana nga idi nabagkongen ket nagidda ken nagsangit gapo iti sakit ti nabagkong ken agsayasayen ti dara.
Kalpasan daytoy, inbatad na a binakal ti kabsat na ti suspek idi maipagarop a gandaten pay ti maseknan a bagkongen ti biktima.
Inbatad na nga awan met ti nagriryan da ken saan na nga ammo ti rason no apay a binagkong lattan ti suspek isuna.
Mainaig iti daytoy, kunana sakbay a nabagkong ket inpang-or ti suspek ti botelya iti ulo ti kasinsin na iti maysa a minatayan.
Iti agdama, kunana a nasayaat metten ti kondisyon na ken agpalaing pay laeng sakbay a sumrek iti pagadalam.
Kabayatanna, maluksaw ni Mrs. Janice Espiritu iti pannakabagkong ti anak na nangruna ket awan met pulos ti nakaidamdamagan ti maseknan a madi.
Kageddan iti daytoy ket immapela pay ni Mrs. Espiritu ti nagbalin a komento dagiti sumagmamano a tattao a nangibaga a “deserve” ti ubing ti mabagkong, nga amoen da kuma pay laeng ti sibubukel nga istorya.
Binalakadan pay ti ina ti suspek a saan kuma a kastoy ti inaramid iti anak na gapo ta narisgo ti biag ti maseknan.
Inpetteng na a no pudno man a nang-bully ti anak na ket saan latta a nainkalintegan ti inaramid ti suspek nangruna ket adda met ti pagadalan a mangtratar iti daytoy.
Innayon na a ti manamnama met ti papan dagiti magisursuro iti pagtaengan da tapno personal met a makasarita ti biktima. Kageddan iti daytoy ket nagyaman ni Mrs. Espiritu kadagiti amin a nangtulong iti pamilya da kas kadagiti nagidonar ti dara ken iti pinansyal nga aspeto.
