LAOAG CITY – Nagnegatibo ti estudiante nga agtawen ti 19 ken residente iti Barangay Dariwdiw iti ciudad ti Batac a naarestar iti naisayangkat nga anti-illegal drug buy-bust operation idi Nobiembre 21.
Nupay kasta napilaanen ti kaso a panagsalungasing iti Republic Act 9165 wenno Comprehensive Dangerous Drugs Act of 2002 ti kontra iti supek ken maururay ti commitment order iti pannakaipisok na iti Bureau of Jail Management and Penology ditoy siudad ti Laoag.
Maipalagip nga inbatad ti City Drug Enforcement Unit a ti estudyante a naarestar iti naisayangkat nga anti-illegal drug buy-bust operation idi kalman ket maibilang kas Street Level Individual iti Drug watchlist ti Philippine National Police ditoy ciudad.
Basar iti Philippine National Police, intudo dagiti immunan a natiliw gapu iti illegal a droga ti nasao nga estudyante isut gapuna a minonitor dagiti otoridad agingga nga insayangkatan da daytoy ti operasyon.
Immuna iti daytoy, dagus a kinemmeg dagiti otoridad ti subject ti operasyon kalpasan a naglako ti maysa a sachet a naglaon ti maipagarop a napagango a bulong ti marijuana iti maysa a pulis a nagpammarang kas poseur-buyer.
Nakumpiskar pay iti ikot na ti maysa a pakete ti sigarilyo a naglaon metlaeng ti maipagarop a marijuana ken ti sangaribo a pisos a nausar iti operasyon.
Rumrumuar nga agdagsen ti 19 a gramo dagiti nakumpiskar a maipagarop a marijuana manipod ken ni Bolo.
Kabayatanna, naiget a naglikudan ti estudyante dagiti ebidensya a naala manipod kenkuana.
