LAOAG CITY – Inpakaammo ni PMaj. Arnel Tabaog, ti hepe ti PNP-Vintar a naawatdan ti medical certificate ni Eleazar Agsalda Jr. alyas Atop iti Brgy. Margaay iti nasao nga ili.
Kuna na a malaksid iti sugat ti tengnged ket nailanad pay iti medical certificate nga adda ti fracture iti paragpag ken nagduduma a paset ti bagi ti biktima.
Gapu iti daytoy, inbatad na a posible a nadungpar iti kurong-kurong wenno kotse ti biktima.
Kabayatanna, agimbestigarda latta iti posible a person of interest tapno ad-adda a maduktalan ti pudno a puon ti pannakadangran ni Atop.
Innayun na a maadal pay video footage manipod iti nakaiumtar a CCTV iti masakupan ti Brgy. Margaay.
Maipalagip nga adda ti problema iti panagpanpanunot ni Atop ken iti maysa a rabii a rimuar iti pagtaenganda ket nakita na ti grupo dagiti aggi-inom nga isuda Sherwin Tiangga, Thomas Natividad, Charlie Ramones ken Jerico Vargas.
Nu pay kasta, kuna dagiti aggi-inom a nalpasen ti panaginom da gapu ta ammo da ti sitwasyon ni Atop rason nga intuloy daytoy ti nagna agingga nga ilugan met laeng ni Sherwin nga agturong iti sentro ken indissaag na daytoy iti waiting shed nga asideg iti merkado publiko.
Kabayatanna, napan dimmawat ti mainom ken nagcarolling ni Atop kadagiti asideg a pagatengan ngem awan ti nagapuananna ken nagturong iti sentro.
Nu pay kasta, nakita ti blood stain iti waiting shed agingga iti amianan a paset ti merkado publiko ngem ken ti footprints ni Atop ket nakita iti dalan nga agturong iti waiting shed ken iti asideg daytoy ket isu ti nakakitaan dagiti nagresponde kenkuana.
