LAOAG CITY – Inlawlawag ni Dr. Roger Braceros, Chief of Hospital ti Gov. Roque Ablan Sr. Memorial Hospital ti isyu a saan nga inasikaso a naimbag dagiti doktor iti nasao nga ospital ti na-dengue nga ubing.
Segun kenni Braceros, kabaelan dagiti doktor ti GRASMAH a tamingen dagiti pasyente nga addaan ti sakit a dengue ngem kurang da laeng ti pasilidad a pangipanan kadakuada.
Kunana a naipakpakauna kenni Mr. Allan Ross Miguel, ti ama ti biktima a ni Duane Ross Miguel, agtawen ti 10 a na-dengue ti anak na.
Inpetteng ni Braceros a naiget ti panagbantay da iti ubing ken maipakpakaammo kenni Mr. Miguel dagiti resulta iti laboratory test ti anak na.
Mainaig iti daytoy, inbilin da nga iyakar ti biktima iti MMMHMC idiay ciudad ti Batac gapu ta kurang ti ICU iti GRASMH.
Gapu ti daytoy, nailungalong ti pannakaipasdek ti Pediatric Intensive Care Unit iti nasao nga ospital tapno manayonan ti 6 agingga iti 10 ti maakomodar a pasyente.
Inlawlawag na a ti doktor mismo ti mangibaga no masapul a maiyakar ti pasyente iti sabali nga ospital ken nasken nga itawag da nga ummuna iti pagiyakaran ti ospital sakbay a maiyakar ti pasyente.
Kabayatanna, inpasingked ni Doctor Katrina Depona, ti Pediatrician iti GRASMH a saan da a binaybay-an ti pimmusay nga ubing a ni Duane Ross Miguel iti Barangay 2 ditoy ciudad ti Laoag gapu iti sakit a dengue.
Inlawlawag ni Depona iti Bombo Radyo Laoag nga idi napan inpan ti ama na iti ospital ti anak na ket dagus da a tinaming ket ditoy a naamoan da a positibo ti sakit a dengue.
Inbatad na nga inbaga da a dagus ken ni Mr. Miguel ti sitwasyon ti anak na ken amin a resulta ti CBC ken nagdaldalanan nga eksaminasyon ti ubing ket inlawlawag da amin iti nasao nga ama.
Kuna ni Doctor Depona a naiget ti panangmonitor da iti ubing ngem kinasarita da ti ama na a no makitaan da ti indikasyon a bumaba ti blood pressure na, ngumato ti cardiac rate na, ken kumapsot ti pulso na ket maiyakar iti Mariano Marcos Memorial Hospital and Medical Center (MMMHMC) idiay ciudad ti Batac gapu ta awan ti ICU iti provincial hospital.
Innayon na nga Setyembre primero idi admiten na ti biktima ken idi Setyembre 4 iti oras ti alas-3:50 iti malem ket inbalakad da a maiyakaren daytoy kalpasan a bimmbaba ti BP na.
Inbatad ni Doctor Debona a saan dan nga ammo no ania dagiti simmaruno a napasamak kalpasan a naiyakar iti ospital iti ciudad ti Batac ti nasao a biktima
