LAOAG CITY – Saan a kontribusyon ken awan ti eksakto a nadakamat no mano ti bayadan no diket boluntaryo ti maited para iti paggatang ti telebisyon iti maysa a classroom iti Florentino Camaquin Integrated School iti ili ti Vintar.
Daytoy ti inpetteng ni Mr. Jayson Molina, Homeroom President ti Grade 7- Einstein iti nasao a pagadalan kalpasan a naipadanon iti Bombo ti maipagarop a panagpakontribusyon ti maestra a ni Ms. Vanessa Dancel.
Segun kenni Molina, nagpanunumoan da a nagannak nga agtataripnong tapno mapagsasaritaan daytoy ket ti pinal a desisyon da ket boluntaryo ti maited a kantidad ken saan da a piliten dagiti awan ti maited na.
Kunana nga inpakammo da met daytoy kenni Ms. Dancel, gapo ta dagiti annak da laengen ti awan ti telebisyon na iti nasao a pagadalan.
Inbatad na nga iti agdama ket nakaukkon da ti agarop 15 a ribo a pisos ken ti na-canvass na a presyo ti 43 inches a TV ket 17,500 a pisos.
Inpalgak na nga idi nagtataripnong da ket awan met ti nangkontra rason a nasdaaw no adda ti agtaod ita a reklamo.
Numunganay daytoy a desisyon dagiti nagannak gapo ta rumrumuar nga adda ti subject a pakausaran dagiti estudyante iti telebisyon.
Mainaig iti daytoy, naangay manen ti taripnong kadua da ti principal tapno pagsasaritaan no ituloy da wenno saan ti panaggatang ti telebisyon.
Maipalagip a basar iti naipadanon iti Bombo Radyo, maipagarop nga agsingsingir ti maestra ti 400 a pisos iti tunggal estudyante.
