LAOAG CITY – Hustisya ti iyik-ikkis ti pamilya ti biktima ti pammaltog iti Brgy. San Mateo iti siudad ti Batac.
Segun iti anak ti biktima nga agtawen ti 17, naammaonna laeng daytoy a pasamak manipud iti kaklase na.
Inbatadna a basar iti palawag ti ina na, ti laeng nakitana ket ti bala a simrek iti side-car ti tricycle ken saan na a nailasin dagiti suspek.
Kunana nga awan met ti ammo na a karirriri ti ama na isut gapo na a saan da nga ammo no apay a pinalto-paltogan dagiti suspek ti ama na.
Maipalagaip a natay ti biktima a ni Marlo Arconado, agtawen ti 44, naasawaan, empleado iti MKL general merchandise ken residente iti Brgy. San Pedro iti ciudad ti Batac kalpasan a napalto-paltogan iti Batac-Banna road, bisinidad ti Brgy. San Mateo.
Iti panagturong dagiti otoridad ket nakita da ti biktima a nakatugaw iti tricycle na a dara-dara isut gapo na a dagus da nga intaray iti Mariano Marcos Memorial Hospital and Medical Center ngem naideklara a dead on arrival.
Ummunan nga inbatad ti Philippine National Police a bayat ti panangiturturong ti biktima ti tricycle-na kadua na ti asawana ket pinalto-paltogan daytoy ti saan pay a nabigbig a nakamotorsiklo.
Kalpasan daytoy ket dagus met a naglibas dagiti suspek a nakamotorsiklo a nagturong iti daya.
Kabayatanna, nakarekobre dagiti kameng ti SOCO iti nakapasamakan ti pammaltog ti lima a kapsula iti kalibre 45 a paltog.
Iti agdama, agtultuloy ti panangiyus-uswat ti naun-uneg nga imbestigasyon dagiti otoridad para iti pakabigbigan ti suspek ken no ania ti motibo iti napasamak a krimen.
