LAOAG CITY – Inadmitir ni Atty. Bernie Francis Constantino, presidente ti Integrated Bar of the Philippines (IBP) ditoy Ilocos Norte a nakigtot isuna iti pannakatiliw ni Atty. Michael Llaguno babaen ti drug buy bust operation ditoy ciudad ti Laoag.
Segun kenni Constantino, saan na a ninamnama a mairaman ti nasao nga abagado iti kastoy a pasamak gapo ta agpada da pay ti propesyon.
Inbatad na nga awan ti ammo na iti aramid ni Llaguno malaksid laeng iti panagam-ammo da iti trabaho kas abogado.
Kuna ni Constantino a daytoy pay laeng ti nadamag na a nakairamanan ni Llaguno iti iligal a droga.
Mainaig iti daytoy, masapol a masurot ti rule of law ken no pudno nga adda ti iligal nga aramid ni Llaguno ket mapaneknekan apaman a maiyuli iti husgado ken adda met ti kalintegan ti suspek nga agsungbat.
Innayon na nga amin a matiltiliw ket adda ti kalintegan da a mangdepensa iti bagbagi da ket no mangalan to ni Llaguno ti abogado manipud iti IBP ket karbengan na daytoy.
Inlawlawag na a saan a gapo a pada da nga abogado ti akusado ket ibaga dan a saan nga husto ti naiyuswat nga operasyon.
Kabayatanna, immapela ni Constantino kadagiti pada na nga abogado nga agserbi kuma daytoy tapno agbalin a responsable kadagiti aramid da kas maysa nga abogado.
