LAOAG CITY – Inbatad ni Jail Senior Inspector Jayson Mabuti, Jailwarden iti Bureau of Jail Management and Penology iti ciudad ti Batac nga iliw iti pamilya ti rason no apay a naglibas ti maysa a balud iti nadakamat a pagbaludan.
Nabigbig ti balud a ni Mahnoel Ofilas Revilla, agtawen ti 43, naasawaan, drug surrenderee ken residente ti Barangay Medina iti ili ti Dingras.
Ni Medina ket sumangsango kadagiti kaso a panaglabsingna iti Republic Act No. 9165 wenno ti Comprehensive Dangerous Drugs Act of 2002 ken ti Republic Act No. 10591 wenno ti Comprehensive Firearms and Ammunition Regulation Act.
Inbatad ni Mabuti a basar iti imbestigasyon da ket kimmalay-ay iti amianan a paset ti pader ti pagbaludan ti nasao a balud.
Nupay kasta, saan da pay a masinunuo no ania ti inusar ni Revilla ken no kasano a nakakalay-at gapu ta nangato ken adda dagiti barbed wire ti pader.
Inlawlawag na nga awan ti nakamuntar a Closed Circuit Television (CCTV) Camera iti aglawlaw gapu ta adda ti problema dagiti wirings no sadinno a gapu iti kinabayag ti pagbaludan ket kasapulan ti pannaka-rehabilitate dagiti wirings na.
Inpakaammo ti jailwarden nga inpasigurado ti naglibas a balud nga awan ti nangtulong kenkuana ken naaramid na laeng ti naglibas gapu ta kayatna a makita ti pamilya na.
Kinumpirmaran ni Mabuti a sipud naipisok ni Revilla iti pagbaludan ket saan pay a napan binisbisita dagiti kameng ti pamilya na.
Innayon na a kalpasan a nakita ni Revilla ti pamilya na ket kinontak na ti kabagyan ken kinasarita na daytoy a tawagan na ti maysa kadagiti kameng ti Bureau of Jail Management and Penology tapno mapanda sukunen daytoy iti ayanna.
Gapu iti napasamak, inpasingked ni Mabuti nga ad-adda pay a paigetan da ti agbantay ken agmonitor iti aktibidad dagiti balud.
