LAOAG CITY – Manamnama nga agawiden ditoy Pilipinas ni Ms. Catherine Tagaca Andres a residente iti Brgy. 21 iti ili ti Sarrat ken Overseas Filipino Worker idiay Saudi Arabia kalpasan a minaltrato isuna ti amona a lalaki.
Daytoy ket babaen iti tulong ti Bombo Radyo Laoag a nangiyasideg kadagiti amin a maseknan nga indibidual ken ahensia ti gobierno iti napasaran ti maseknan nga Overseas Filipino Worker.
Segun ken ni Mr. Lawrence Valmonte, Overseas Filipino Worker Adviser iti nasao a pagilian, iti agdama ket addan iti sidong ti Philippine Embassy ni Catherine no sadino naikkan daytoyen ti exit visa ngem iyur-urayna pay laeng ti tiketna nga ited ti Khalid Saad Khzam Alhawmizi Recruitment Agency tapno naan-anayen a makaawid ditoy pagilian.
Inbatadna a personal a nakasarsarita ni Labor Attache Hon. Roel Martin iti Migrant Workers Office idiay Jeddah, Kingdom of Saudi Arabia ni Catherine no sadino ket napagnunumoanda iti Recruitment Agency ni Catherine a bayadan laengen ti agency daytoy dagiti nabatina a kagamitan iti nagtrabahoanna a pagtaengan ken ibaklay pay ti Recruitment Agency no adda man dagiti saan a naawat a sueldo ni Catherine manipud iti amona.
Inlawlawagna nga inrekomendar ni Labor Attache Hon. Martin ti “totally block” wenno ti saanen a mapalubusan pay ti amo ni Catherine a makaala ti sabali pay a domestic helper.
Kunana a basar ken ni Catherine ket idi damo ket nasingpet met ti amona isu a nagbayag daytoy iti maysa a tawen ken uppat a bulan.
Nupay kasta, inpalgakna a bayat ti panagtulid ti panawen ket nagbaliw ti ugali ti amona no sadino daytoyen ti maikadua a gundaway a dinangran isuna ti amona.
Innayonna nga adda ti maawat a 20 a ribu a pisos kas financial assistance para iti Balik Pinas, Balik Hanapbuhay livelihood assistance ti Overseas Workers Welfare Administration.
