LAOAG CITY – Inbatad ni Fire Senior Officer III Bonjo Aguinaldo, ti fire marshal iti BFP-Dingras a maiyuswat ti naun-uneg nga imbesitigasyon iti nauram a pasdek negosyo iti Brgy. Albano iti nasao nga ili.
Nu pay kasta, kuna na nga iti immunan a panagimbestigar da ket mapatta-patta a naggapo iti maikadua a kadsaaran a batugen ti panaderya iti nasao a pasdek ti nagrugyan ti uram.
Innayun na nga a nagpaot iti maysa nga oras ti pannakasebseb ti apoy sakbay a naideklara ti fire out.
Nagyaman met ni Aguinaldo kenni Major Roxanne Parado, ti Deputy Provincial Director ti BFP ditoy probinsya iti dagus a panagresponde daytoy idi kalman nu sadino a natawagan na pay ti BFP iti nagduduma nag ili a timmulong iti pannakasebseb ti apoy.
Maipalagip a nagduduma a pagtagilakuan ti naminpinsan a nauram iti nasao a pasdek negosyo nu sadino a karaman ditoy ti panaderya, general merchandise, glass and aluminum supply pakairamanan ti pagdaydayawan.
Awan a pulos ti naisalbar a ramit iti nadakamat a pasdek ken awan met ti nadangran.
