LAOAG CITY – Agtultuloy ti naun-uneg nga imbestigasyon iti pannakapalto-paltog a puon ti nakatayan ti biktima a ni Engr. Rolan Magdirila y Constantino, agtawen ti 60 ken residente iti Brgy. 6 ditoy siudad.
Daytoy ti inpakaammo ni PLt. Col Mar Lousie Bondoc, ti hepe iti PNP-Laoag.
Segun ken ni Bondoc, agpapan ita ket awan pay ti pamalpalatpatan iti pakabigbigan ti suspek iti nasao a krimen.
Inbatad na a masublian ti pannakaadal dagiti nakaimuntar a cctv iti asideg ti nakapasamakan ti krimen.
Mainaig iti daytoy, kuna ni Bondoc a maysa kadagiti makitkita a motibo iti pammaltog ket gapu iti personal a riri.
Immunan nga inpakaammo ti hepe a naggapo iti water refilling station ti inhinyero ken bayat nga adda iti paset ti Rizat St. Brgy. 1 ditoy ciudad ti Laoag ken agawid iti Brgy. 6 ket dita a napalto-paltogan iti ado a daras.
Nagsagaba ti pito a tama ti bala ti paltog iti nagduduma a paset ti bagi ti inhinyero rason ti dagus a pannakatay na.
Kalpasan ti pammaltog, nakarekobre dagiti otoridad ti pito a kapsula ti maipagarup a kalibre 45 a paltog, maysa nga sludge, ken maysa a buli.
