LAOAG CITY – Agtultuloy ti imbestigasyon dagiti kameng ti Bureau of Fire and Protection (BFP) iti ili ti Currimao mainaig iti pannakuram ti maysa a bodega ti plastic iti Barangay Pias Sur iti nasao nga ili.
Segun kenni Senior Fire Officer 3 Victorino Pacris, OIC Fire Marshall iti nadakamat nga ili, agkalkalap da pay laeng kadagiti nagduduma nga impormasyon tapno madeterminar da ti namunganayan ti uram.
Kunana nga agarop 5:30 idi malem kalman idi indeklara ti BFP a fire out kalpasan ti nasurok tallo nga oras a panangsebseb da iti dakkel nga apoy.
Naamoan a ti bodega ket kukua ni Mayor Edward Quilala ket up-upaan ni Jene Pua Wu para iti negosyo na idinto a ni Weichuan Wu ti caretaker ti bodega.
Iti inisyal a panagimbestigar dagiti kameng ti BFP-Currimao, idi napasamak ti pannakauram ti bodega ket awan ti caretaker gapo ta adda ti napan na ginatang, ngem nakita ti maysa a barangay tanod nga adda ti agas-asok.
Gapo iti daytoy, napan da iti ayan ti asok ngem naduktalan da a naka-lock rason a napan da inayaban ni Wu, ken timmawag da iti BFP.
Inbatad pay ni Pacris a marigatan da a makisarita iti caretaker a ni Wu gapo ta saan unay a makaawat ti tagalog ken kasapulan da ti interpreter.
Basar pay kenni Pacris, ti bodega ket isu ti pagikabilan da kadagiti plastic sakbay da a tunawen dagitoy ken mailako idiay Metro Manila, ngem agarop tallon a bulan a saan a nagoperar sipud naipatungal ti lockdown isut gapo na a burburtya kadakuada no apay a nauram.
Mapatta-patta nga agarop tallo a milyon a pisos ti balor dagiti kagamitan a nauram.
