LAOAG CITY – Inpakaammo ni P/Capt. Randy Damo, Hepe ti San Nicolas Municipal Police Station nga imon ti rumrummuar a rason iti napasamak a pammaltog iti Brgy. 22, San Guillermo iti ili ti San Nicolas.
Segun kenkuana, agim-imon ti suspek iti asawana rason a nagprobokar daytoy iti pagtaenganda babaen ti panangiruarna kadagiti aruaten ti asawana ken pinuoranna dagitoy.
Gapu iti daytoy, inbatadna a kinomprontar ti babai ti asawana ngem nagpungtot ti suspek isu a napan nangala ti kallugong ken intungpana daytoy iti rupa ti babai.
Mainaig iti daytoy, inlawlawagna a nakita ti maysa kadagiti anak dagiti agasawa ti napasamak isu a napanna dinanog ti rupa ti amana iti naminsan a daras.
Kunana a nakabusor ti ama isu a napanna met innala ti iduldulinna a paltog ket ditoy a pinaltoganna ti bukudna nga anak iti nagduduma a paset ti bagina iti sumagmamano a daras.
Innayonna a narekobreda iti nakapasamakan ti insidente ti dua a magazine ti 5.56 ken dua a magazine ti 7.62 pakairamanan ti lima a kapsula ti paltog.
Naammoan a naiwayatan ti suspek ti Search Operation idi 2014 a nakakumpiskaran ti paltog ken pagpabettak.
Maipalagip a natay ti biktima a ni Jovanie Cabbat, agtawen ti 25 kalpasan a pinaltogan ti bukudna nga ama a ni Fermin Cabbat, agtawen ti 57 a retirado a Philippine Army a nagretiro idi 2010.
Iti agdama, agtultuloy a birbiroken dagiti otoridad ti paltog a nausar iti nasao nga insidente.
