LAOAG CITY – Awan ti ammo ni Mrs. Louisa Bonilla, ina ti pimmusay a biktima a ni Mr. Antono Bonilla ti rason ti napasamak a pammaltog iti Barangay 6 iti ili ti San Nicolas.
Segun kenni Mrs. Bonilla, nakigtot laengen idi adda ti nangeg na a maysa a putok ken ad-adda pay ti panagnerbyos na idi naamoan na a ti anak na ti napaltogan.
Inlawlawag ti ina a Bonilla nga awan met ti ammo na a nakariri ti anak na, ken agsao-sao laeng no mabartek ken ti maysa a dakdakamaten na ket ti pannakarakrak ti abong-abong na a nangpasangbayan na iti pamilya ti pagayam na.
Ummuna iti daytoy, kuna na nga idi napatalaw ti pamilya ni Ramil ken Loida manipud iti nagkaseraan na ket ti biktima ti nangpasangbay kadakuada ken inpatakderan na ti abong-abong.
Nupay kasta, inbatad ni Mrs. Bonilla a saan na nga ammo ti rason wenno nagbasolan dagiti agasawa a Ramil ken Loida gapo ta patpatalawen ti biktima dagitoy.
Mainaig iti daytoy, iti laksid a narakraken ti abong-abong nga inpatakder ti biktima ket adda pay laeng iti barangay da dagiti agasawa gapo ta pinasangbay manen ti inauna nga anak na.
Inbatad met ti kabsat ti biktima a dagiti dua a nakainuman ni Bonilla a da Michael Aceret ken Emmanuel Garcia ket naimbitaran iti PNP-San Nicolas para iti naan-anay nga imbestigasyon iti nasao a pammaltog a nakatayan ti biktima.
Maipalagip a bayat nga umis-isbo ti biktima ket napaltogan ken nagsagaba ti tallo a tama ken ti rumrumwar a nausar a paltog ken shotgun.
