LAOAG CITY – Emosional ni Mrs. Juvelyn Paleracio Juan, ina ti indibidual a maipagarup a binekkel ni Barangay Chairman Rey Menor iti Brgy. 41, Balacad ditoy siudad ti Laoag iti nakapamay-an ti anak na a mapan laeng kuma aganawa kadagiti nagririri.
Segun kenni Juan, nasakit ti nakem na kas maysa nga ina ken saan a rumbeng ti inaramid ti kapitan iti anak na.
Inpetteng na a kas ama ti barangay ket isu kuma ti agbalin nga ehemplo iti nasayaat a kababalin.
Inlawlawag na a basar iti palawag ti anak na kenkuana, awan ti intensyon na a makiraman iti tension ti nagbaetan ti ama na ken kabagian da.
Mainaig iti daytoy, inpalgak na nga awan met ti anyaman a madi a rekord wenno madi a pakasaritaan ti anak na iti barangay da.
Kabayatanna, inbatad na a panpanunuten da pay laeng no mangipila da ti reklamo kontra iti kapitan ngem agpadespensar daytoy kadakuada ket sidadaan da a mangpakawan iti daytoy.
