LAOAG CITY – Naduktalan a ti pimmusay nga Indian National a nakalugan iti Hongkong Vessel kabayatan ti kaadda da iti kabaybayan a paset iti ili ti Pagudpud ket agsagsagaba daytoy ti sakit a diabetes ken addaan ti sakit iti puso, basar iti medical rekord ti gangannaet.
Daytoy ti inbatad ni Mr. Hendrick Pedronan ti mangidadaulo iti Municipal Disaster Risk Reduction and Management Office iti ili ti Pagudpud.
Inpakaammo ni Pedronan nga iti agdama ket maiyur-uray paylaeng ti pamilya ti Indian National para iti panangala da ti bangkay na iti maysa a punerarya ditoy ciudad ti Laoag.
Inlawlawag ni Pedronan a kalpasan a naawat da ti tawag ti kapitan ti barko a sabalin ti kasasaad ti salun-at ti agtawen ti 59 nga Indian National ket insigida da a nagturong iti lugar.
Kuna ni Pedronan a kadwa da a nagresponde dagiti kameng ti Philippine Coastguard ken ti Municipal Health Office babaen ti panangusar da ti sea ambulance nga inpaay ti Department of Health.
Segun ken ni Pedronan, ti Hongkong Vessel nga addaan ti nasurok a 20 a pasahero ket aggapo iti South Korea ken agturong koma idiay Subic.
Inlawlawag na saan dan a naidanun a sibibiag ti Indian National iti kaasitgan nga ospital iti ili ti Pagudpud.
