LAOAG CITY – Inbatad ni Barangay Chairman Edwin Sueb iti Barangay Angset iti ili ti Carasi a nakapagsasarita dan ken ni Engr. Villanueva mainaig kadagiti sinako a basura a naibelleng iti barangay da iti kallabes.
Inbaga na a natuntun da no siasinno ti napan nagibasura iti lugar babaen kadagiti surat no sadinno nga adda ti nagan ni ENgr. Villanueva ken maysa pay a babai.
Inpakaammo ti kapitan nga iti panagsasarita da ket inadmitir ti inhinyero a biddot na ti panagibasura na iti lugar.
Kuna na a basar iti palawag ni Villanueva, nalipatan na nga inbati iti pagbasuraan iti ili ti Piddig dagiti basura nga adda iti lugan na iti panagturong na iti project site na iti ili ti Carasi.
Gapu iti daytoy, inbelleng na ti karga na a basura iti barangay da.
Inpakaammo ti kapitan a gapu iti inaramid ti inhinyero ket pinagmulta da ti sangaribo a pisos kas naipalaon iti ordinansay iti barangay da.
