LAOAG CITY – Umab-abot iti nasurok nga 600 a ribo a pisos ti mapatta-patta a balor dagiti nadadael iti pannakauram ti maysa a balay iti Brgy. 51-B Nangalisan ditoy ciudad ti Laoag.
Daytoy ti inbatad ni Fire Senior Inspector Ronald Castillo, ti firemarshall iti Bureau of Fire Protection ditoy ciudad.
Inlawlawag ni Castillo a ti nasao a gatad ket inisyal paylaeng a balor dagiti nadadael iti pannakauram ti balay a kukua ti nabigbig laeng iti nagan a “Mrs. Javier”.
Innayon na a mabalin a manayunan pay ti nasao a gatad gapu ta agtultuloy paylaeng ti imbestigasyon da no sadinno nga ado dagiti nadadael a kagamitan iti uneg ti balay.
Immunan nga inrakurak ni Castillo a nangrugi ti apoy iti altar iti uneg ti pagtaengan a nauram ken basar iti panagimbestigar da ket ti kuryente a maus-usar iti altar ken dagiti waya ti possible a nalunag.
Kuna ni Castillo a malaksid iti daytoy ket naduktalan a ti fuse box iti pagtaengan ket naka-jamper wenno naikkan ti barot nga isu ti ad-adda a nangdegdeg ti uram.
Mainaig iti daytoy, inpakaammo ni Castillo a karaman kadagiti nauram ket dua a kwarto iti nasao a pagtaengan ken dagiti machines nga us-usaren ti maysa a bumalay a napan iti ballasiw taaw iti napalabas a bulan.
