LAOAG CITY – Mamati ti Ilocos Norte Police Provincial Office a planado ti panangpaltu-paltog ken ni ABC President Mark Adrian “Macky” Barba pakairamanan dagiti dua a bodyguard-na iti sango ti Pamulinawen Hotel iti Brgy. 22 iti ili ti San Nicolas.
Segun ken ni P/Maj. Jephre Taccad, Chief ti Provincial Operation Management Unit ti Ilocos Norte Police Provincial Office, basar iti inisyal nga imbestigasionda ket adda ti maysa a puraw a van a posible nga isu ti nagluganan dagiti adda iti likudan iti nakaam-ames a krimen.
Inbatadna a dakkel ti posibilidadna a pinadaanan dagiti suspek dagiti biktima ken rumrummuar nga adda ti nakasinnungbat ti ABC President iti galyeraan iti ili ti San Nicolas.
Inlawlawagna a ni Barba ket maibilang nga High Value Individual Drug Watchlist, drug surrenderee idi 2017, naiwayatan ti Search Operation gapu iti loose firearm idi 2017 ken maipagarup nga agus-usar ti droga kas maibasar iti Philippine Drug Enforcement Agency.
Kunana a dagiti narekobre iti nakapasamakan ti insidente ket dagiti kapsula ti 9mm ken 5.56 a paltog.
Mainaig iti daytoy, inpakaammo ni P/Maj. Sheryl Guzman, pannakangiwat ti Ilocos Norte Police Provincial Office, dagiti narekobreda nga ebidensia ket ti dua nga unit ti caliber 9mm, addaan ti magazine nga adda ti kargana a 15 a bala, maysa a deformed fired bullet, maysa a metal fragment, 45 a bala ti caliber 5.56, dua nga additional magazine ti 9mm nga addaan ti sag-15 a bala, maysa nga unit ti caliber 9mm nga addaan ti dua a magazine nga adda ti kargana a sag-15 a bala a naala manipud iti shoulder bag ti biktima.
Iti agdama, manarimaan ti profiling dagiti dua a kakadua ti ABC President.
Maipalagip a pimmusay ni ABC President Barba pakairamanan dagiti dua a bodyguard-na kalpasan a pinaltu-paltogan dagiti saan pay a nabigbig a suspek iti sango ti Pamulinawen Hotel iti Brgy. 22 iti ili ti San Nicolas.
Kabayatanna, naammoan nga agtultuloy pay laeng ti panangduktal dagiti otoridad kadagiti suspek a nangpapatay met ken ni Barangay Chairman Francisco Bagay Jr. ti Brgy. 5 iti ili ti San Nicolas iti kallabes.
