LAOAG CITY – Agtultuloy ti naiget a pannakamonitor dagiti nagpositibo iti covid-19 iti Brgy. 23 ditoy siudad ti Laoag.
Daytoy ti inpakaamo ni Brgy. Chairman Primo Jay Ramos iti nasao a barangay.
Kuna ni Ramos nga adda ti maysa nga health personnel iti barangay da a nadutukan a mangbantay ti compound dagiti nagpositibo ken daytoy ti agited kadagiti kasapulanda.
Mainaig iti daytoy, inbaga na a manipod iti nasurok laeng a 35 a pamilya nga immunan a nailockdown iti noertheastern portion ti Sitio Dungtal ket umaboten iti 400 a pamilya ti karaman a nailockdown kalpasan a napagnunumoan ti konseho a maipan iti lockdown ti intero a Sitio tapno maliklikan ti panagwaras ti virus.
Inbaga ni Ramos a saan metten a maipan iti quarantine facility dagiti lima a naudi a nagpositibo iti barangay da agsipod ta maymaysa metlaeng iti compound a pagnanaedan da.
Maipalagip nga immuna a nakumpirmaran a nagpositibo iti Covid-19 ni IN-C134 iti nasao a barangay, maysa nga ambulant vendor.
Kalpasan na ket naggi-giddan a nagpositibo dagiti lima a kapamilya a nakapulapol na.
Gapu iti daytoy, naiyalud-od ti lockdown iti Sitio Dungtal iti nasao a barangay.
