LAOAG CITY – Inlawlawag ni Mr. Khristian Paul Maglaya, Labor Communications Officer ti Overseas Workers Welfare Administration wenno OWWA Region 1 no apay adda dagiti saan a nakaawat ti calamity assistance ditoy Ilocos Norte.
Segun kenni Maglaya, daytoy ket kalpasan a naammoan da nga adu kadagiti Overseas Filipino Workers ti saan nga aktibo ti Overseas Workers Welfare Administration Membership na rason a saan da a nagbalin a kualipikado a makaawat ti nasao a calamity assistance.
Inbatadna a naipakaammo met dagiti requirements kadagiti Local Government Units tapno mapakaammoan dagiti maseknan nga umili banag a daytoy ti nagbalin a problema gapu ta kaadduan kadagiti napan nagatendar iti Ilocos Norte Centennial Arena ket naladaw a naipakaammo kadakuada.
Inlawlawag na nga umabot iti nasurok-kumurang tallo a ribu nga umili ditoy probinsia a naapektaran ti Bagyo Neneng ti nabenipisiaran ti nasao a calamity assistance no sadino nakaawat dagitoy ti tallo ribu a pisos.
Kunana a naarisit a naimbag dagiti inpasa dagiti kabagian ti Overseas Filipino Workers a dokumento a mangpaneknek a dagitoy ket biktima ti isasaplit ti Bagyo Neneng itay napan a tawen.
Mainaig iti daytoy, kuna ni Maglaya nga inaramid amin ti Overseas Workers Welfare Administration Region 1 ti kabaelan na a pagtalnaen dagiti tattao iti lugar a nakaisayangkatan ti programa ngem nagtultuloy dagitoy a nagringgor ken nagriri.
Nupay kasta, kunana a nangala da ti listaan kadagiti kabagian ti Overseas Filipino Workers tapno maberipikar no active wenno saan ti Overseas Workers Welfare Administration Membership dagitoy.
Kunana a no saan a natawagan dagiti kabagian ti Overseas Filipino Workers idi Biernes ti rabii ken bigat ti Sabado a kayat na a sawen a saan nga active ti Overseas Workers Welfare Administration Membership dagiti maseknan.
Innayonna a sakbay a naiyuswat ti programa iti Ilocos Norte Centennial Arena ket nagturong da pay kadagiti nasusulinek a lugar kas iti ili ti Pagudpud, Dumalneg ken Bangui para iti pannakaited ti calamity assistance.
Kabayatanna, apaman a maisursurat daytoy a damag ket maiyur-uray ti Official Statement ti Overseas Workers Welfare Administration Region 1 seknan iti daytoy.
