LAOAG CITY – Inpetteng ni Barangay Captain Joseph Bitagon iti Barangay Balatong ditoy ciudad ti Laoag nga awan ti kinapudno na ti rakurak ni Mrs. Lorna Domingo a saan a trinatar ti barangay ti pannakaubor-ubor ti pagtaengan na.
Segun kenni Bitagon, adda ti naiyuswat a panagsasarita iti nagbaetan ti anak ni Domingo a ni Angelo ken dagiti nagubor isut gapo na a nasdaaw no apay nga inbaga ti maseknan nga awan ti aksyon ti barangay.
Inlawlawag ti kapitan a basar iti imbestigasyon ti barangay, adda ti limmabas a natagari a motorsiklo iti pagtaengan da Domingo ken nagbugkaw daytoy rason a nagsardeng met dagiti maseknan agingga a rimuar ni Angelo Domingo.
Inbatad na a ti ammo dagiti makamotorsiklo ket kamaten ida ni Angelo rason a nagpataray da ngem nagsubli da agingga a nagsinnungbat dagitoy.
Kunana a basar iti pamilya dagiti nakamotorsiklo, maipagarop nga ummuna a nagbakal ti anak ni Domingo ken bimmales da laeng agingga a nagbinbinnakal dagitoy rason nga adda met ti nadangran ken adda ti nadadael iti pagtaengan ti pamilya Domingo.
Kalpasan daytoy, napan nagpa-blotter dagiti maseknan a kinariri ni Angelo ken inpaima met ti Philippine National Police kenkuana ti napasamak ken ditoy a naiyuswat ti panagsasarita no sadinno ket inikkan na pay dagitoy ti ultimatum a no agririri pay dagitoy ket saan na nga isyuan ti anyaman a barangay clearance.
Inpalgak na a gapo ta agpinnabayad dagiti maseknan iti gastos da ket insuhentyun na nga ibaklay da ti bukod da a gastos tapno malpasen ti saritaan ken riri ken immanugot met dagitoy no sadinno ket adda ti kasuratan a pinirmaan da.
Mainaig iti daytoy, inpetteng pay ti kapitan nga awan pulos ti dinakdakamat na a saan na nga isyuan ti clearance ti paglechonan no saan a maurnos ti riri dagiti maseknan.
Kabayatanna, kuna ti kapitan a mabalin a sabali ti naidanon kenni Mrs. Lorna Domingo nga iti agdama ket adda idiay Cyprus.
