LAOAG CITY – Inpetteng ni Barangay Chairman Florendo Corpuz iti Barangay 14 iti ili ti San Nicolas nga awan ti lapdan na a maipaay a tulong kadagiti kabarangayan da kangrunaan na kadagiti agkasapulan partikular ti pannakanayon ti bilang dagiti immawat iti Assistance to Individuals in Crisis Situation.
Nupay kasta, kalikagom ti kapitan a maipadalan iti legal a proseso no sadinno ket maipakammo iti konseho tapno maikkan met ti gundaway dagiti dadduma nga opisyal a mangirekomendar kadagiti ka-sitio da a kwalipikado iti tulong.
Sungbat daytoy ni Corpuz iti rakurak ni Barangay Kagawad Bryan Casabay a rumbeng kuma a maragsakan ti kapitan kadagiti ado a tulong a maipapaay kadakuada.
Segun kenni Corpuz, 10 laeng ti naibaga kenkuana a benepisyaryo isut gapo na a nasdaaw idi nakaad-ado metten a tao isut gapo na a nagsaludsod ken naamoan na a ni Kag. Casabay ti napan nagibagaga ken rumrumuar a mandar ti Mayor iti ili da ti 30 pay nga slot.
Saan met a patien ni Corpuz a limitado laeng ti oras a naited kenni Casabay isut gapo na a saan nan nga inpakammo iti konseho ti barangay gapo ta sumagmamano pay laeng nga aldaw ti napalabas kalpasan nga adda ti timmawag kadakuada.
Gapo iti daytoy ket kalikagom ti kapitan a mare-assess dagiti napili a 30 a benepisyaryo tapno makita a nalaing no kwalipikado amin dagitoy.
Mainaig iti daytoy, naglikudan ni Corpuz ti alegasyon a sakbay a mailista ti nagan dagiti kabarangayan na a posible nga umawat ti tulong ket maipagarop a damagen na no kadua na dagitoy gapo ta saan na nga ikonkonektar iti eleksyon ti anyaman a tulong a maipaay iti barangay da ken saan na a bibiangan no siasinno ti butosan dagiti kabarangayan na.
Inlawlawag pay ni Corpuz nga awan ti kinapudno na nga adda ti ibunbunong na a karne ti baboy ken 500 pesos. Kabayatanna, nasdaaw ti kapitan no apay a nairiing pay laeng ti isyu seknan iti panagpirma na idi ti sertipikasyon para iti pannakaiserrek ti baboy gapo ta nasolbaren daytoy no sadinno inadmitir na nga ada ti kamali na ken nagpadespensar idi nagsasarita da iti Sang. Bayan.
