LAOAG CITY – Inlawlawag ni Brgy. Chairman Leonidas Ruiz iti Brgy. 19 ditoy siudad ti Laoag ti alegasyon ti pamilya Aguinaldo kontra kenkuana.
Segun ken ni Ruiz, namunganay ti pannakaipan iti lockdown ti pagtaengan dagiti Aguinaldo kalpasan a nagresistir ni Noel Aguinalda a dumalan iti swab test.
Inbatad na a dagiti kameng ti CHO ti nangmandar a dumalan iti test ngem gapu ta nagkedked ket masapol a dumalan iti 14-days quarantine.
Inpetteng na nga awan ti karbengan na a mangipatungpal ti lockdown nu awan ti mandar ti CHO.
Kabayatanna, kuna ni Brgy. Kagawad Allen Cabugen nga arogante ni Mr. Noel Aguinaldo idi napan da nagresponde iti pagtaenganna.
Inbatad na nga arigna awan ti panangsurot na kadagiti pagalagadan kontra iti virus agsipod ta saan a nakasuot ti face mask nu pay adda iti ruar ken nagkedked a dumalan iti swab test.
Inlawlawag ni Ms. Ruby Ann Felipe, maysa kadagiti contact tracers a nangtratar iti kaso ni Mr. Noel Aguinaldo a saan a naibase ti sitwasyon kas primary wenno secondary contact.
Kuna ni Felipe a ni Aguinaldo ket karruba ti nagpositibo iti covid-19.
Inbatad na a karaman ti pagtaengan ti pamilya Aguinaldo iti area of containment isut gapu na a nasken nga adda ti dumalan iti test a maysa a miembro ti pamilya wenno dumalan iti 14-days quarantine.
Inpakaammo na a nagkedked a dumalan iti test ni Aguinaldo rason a naipakat ti 14-days quarantine.
Innayun na a nu man nakapulapol na dagiti tallo a primary contact a nagturong iti pagtaengan wenno saan ket karaman latta ni Aguinaldo iti area of containment gapu ta karruba da ti nagpositibo ti virus.
