LAOAG CITY – Agkidkiddaw ni Barangay Chairman Casimiro Galicinao, ti Barangay 20 Pulangi iti ili ti Bacarra iti alisto a pannakaisubli ti transformer kangrunaanna iti paset ti Sitio Bugas.
Inbatadna a daytoy ket kalpasan nga inikkat ti Ilocos Norte Electric Cooperative wenno INEC ti nasao a transformer a nangitunda ti panagpukaw ti kuriente dagiti sumagmamano a residente iti barangayda.
Inpalgakna a masdaaw pay daytoy no apay awan man laeng ti pakaammoda kenkuana kas maysa a Kapitan tapno napakaammoanna met dagiti kabarangayanna.
Inlawlawagna nga awan met ti naipadpadanon kenkuana a reklamo dagiti residente a perdi ti transformer gapu ta sipod nainstolar daytoy ket awan ti nagbalin a problema.
Gapu iti daytoy, kuna ni Kapitan Galicinao nangaramidda ti request letter a pinirmaan dagiti residente a naapektaran ti panagawan ti serbisio ti kuriente nga inpasada iti nasao a kooperatiba.
Innayonna nga awan ti pakainaigan iti pulitika iti napasamak a pannakaikkat ti transformer ngem mangnamnama daytoy a maisubli iti kabiitan a panawen.
Maipalagip nga inlawlawag ni Atty. Nikki Pilar nga alisto a naperdi ti transformer gapu ta naidaras laeng a naikabil tapno adda ti usaren dagiti residente rason a kinasapulanda nga ikkaten ken plastaren a naimbag tapno nasaysayaat ti pannakaipaay ti serbisio kadagiti residente.
Naammoan a ni Pilar ti nagpatulongan idi ni Kapitan Galicinao iti pannakainstolar ti nasao a transformer.
Kabayatanna, ni Pilar ket naabak iti kina-Bise Mayor iti ili ti Bacarra iti kaliplippas a 2025 Midterm Elections no sadinno a rumrummuar a nababa ti naalana a butos manipud iti nadakamat a barangay.
