LAOAG CITY – Manamnama a mapilaan ti kaso a Double frustrated murder ti suspek iti napasamak a pammaltog iti Brgy. Sagpatan ili ti Dingras a ni Sammy Alejo.
Daytoy ti inpakaammo ni PCapt. Norman Pentang, hepe ti Philippine National Police Dingras.
Immuna iti daytoy, kuna ni Pentang nga agtultuloy ti pannakaiyuswat ti naun-uneg nga imbestigasyon iti pammaltog.
Inpakaammo na nga iti agdama ket awan met pay ti narekobre da a paltog malaksid kadagiti immunan a nakumpiskar manipod iti suspek a magasin ken sumagmamano a bala.
Innayun na nga uray ti kwarta a bitbit dagiti biktima a mapan iti pagbolaan idi napasamak ti insidente ket saan pay a nabirokan.
Maipalagip nga inbatad ni Henson Aguiran, maysa kadagiti biktima ti pammaltog iti Barangay Sagpatan iti ili ti Dingras a bayat a nakamotorsiklo da kenni Roldan Deuz ket sinada ni Sammy Alejo ida ken dumawat ti paggasolina.
Segun kenni Aguiran, naibaga ti kadua na a ni Deuz a bassit ti gasolina da ken nakigtot laengen gapo ta natuliden ti kadua na.
Inlawlawag na nga idi bimmaba isuna iti motorsiklo ket adda ti nangeg na a putok ken nadlaw nan a natamaan iti akin kannigid a lapayag na.
Kuna pay ni Aguiran a maipagarop pay nga indanog ni Alejo ti paltog iti bukot na ken kinasarita na pay laeng ti suspek no sadinno naibaga na a babassit pay dagiti annak na agingga a nagtaray ken nabati ti kadua na.
Mainaig iti daytoy, inbatad na nga awan met ti ammo na a nagriryan da kenni Alejo nga isu kuma ti mabalin a rason daytoy.
Naamoan manipud kenni Aguiran a ti ama ken ina ti suspek ket collector da iti STL.
Kabayatanna, nagtalinaed ni Deuz iti Intensive Care Unit iti Mariano Marcos Memorial Hospital and Medical Center iti siudad ti Batac para iti naan-anay a pannakamtaming na.
