LAOAG CITY – Inpakaammo ni PSSgt. Jose Adap, ti imbestigador iti napasamak a panagtagbat iti Brgy. 21 iti ili ti San Nicolas a nakaruaren iti ospital dagiti biktima iti nasao nga insidente.
Mainaig iti daytoy, kuna na a nagtalinaed iti kustodyar ti PNP ti suspek ken manamnama a mapilaan ti kaso a frustrated homicide ken physical injury.
Immuna iti daytoy, inpakaammo ni Adap a ti namungayan ti insidente ket riri iti pamilya a bimmara bayat nga adda iti impluwensya ti nasanger dagiti maseknan.
Maipalagip nga iti naiyuswat nga imbestigasyon, dimmanun ti suspek iti pagiinoman dagiti biktima ket dita a timpuar ti nabara a diskusyon dagitoy.
Nangala ti buneng ti suspek ket dita a natagbat na ti biktima nga agnagan ti Constante, ken napasamak pay ti panaggubal da.
Ginandat ti agnagan ti Roel ti aganawa ngem insublat ti suspek a tinagbat daytoy.
Nagsagaba ni Constante ti sugat iti ima idinto ni Roel ket nasugatan ti barukong ken iti ulo daytoy.
