LAOAG CITY – Kinumpirmaran ni Police Major Allan Emerson Dauz, ti chief of police iti ciudad ti Batac a pilaan da ti kaso a reckless imprudence resulting in homicide ti driver ti dump truck iti napasamak a nakaam-ames a desgrasya iti paset ti Barangay Magnuang idiay ciudad ti Batac idi kalman.
Nabigbig daytoy a ni Allen Steven Bartolome y Acacio, agtawen iti 34, taga Barangay 6, Parot idiay ili ti Vintar.
Ummuna iti daytoy, agpada a pimmusay dagiti biktima a naglubbon iti motorsiklo nga agpada a menor de edad a da John Lloyd Badua kenni Christian Roy Moises Miguel, agpada a residente dagitoy iti Barangay Quiling Norte iti ciudad ti Batac.
Segun kenni Dauz, ur-urayen da laengen ti desisyon ti nagannak dagiti biktima para iti pannakaipursige ti kaso a maipila kontra kenni Bartolome.
Maipalagip a bayat nga agpapaabagatan a direksyon ti dump truck ket nakadinnungpar ti napaspas a motorsiklo dagiti menor de edad ken rumrumwar nga immagaw da iti linya a nangitunda ti desgrasya a puon ti nakatayan da.
