LAOAG CITY – Kinumpirmaran ni Police Captain Carlo Abing, ti chief of police ti PNP-Sarrat a maipila intono bigat, aldaw ti Lunes ti kaso a frustrated murder kontra kadagiti suspek iti napasamak a panagtagbat iti Barangay 21, San Marcos iti nasao nga ili.
Daytoy ket kalpasan a naalaan ti affidavit ti suspek ken dagiti dua a witness iti nasao nga insidente.
Nabigbig ti biktima a ni Edmond Baoat y Calagui, 61 ken residente iti nasao a barangay idinto a dagiti suspek ket isuda Dexter Lucban, Hardy Lucban, ken dua a kakadwa da a saan a pay nabigbig.
Maipalagip a napasamak ti panagtagbat idi limmabas ti anak ti biktima a ni Billy Baoat y Doronio ken Wilson Ramos y Dorotan, 24 iti balay dagiti suspek ken ditoy a maipagarop nga inbakal da ti maysa a botelya ti arak iti grupo dagiti suspek.
Gapo iti daytoy, kinamat dagiti suspek dagiti dua agingga a napatulong dagiti maseknan iti biktima ken iti panagresponde ni Edmond Baoit ket ditoy a maipagarop a natagbat ti akin-kannigid nga ima ken rupa na.
Naamoan nga ado ti tagbat iti ima ti biktima gapo ta isu ti insarsarpa na iti buneng a nausar iti insidente.
Segun kenni Abing, agtultuloy da pay laeng a birbiruken dagiti uppat a suspek.
