LAOAG CITY – Inbaga ni Police Lt. Col. Rafael Lero, ti chief of police ditoy ciudad ti Laoag a nabigbig dan ti akinkukua ti kotse a nagluganan ti natiliw a drug courier a ni Ronald Melchor a taga Baguio City ngem agdama nga agnanaed idiay Quezon City.
Iti eksklusibo nga interview ti Bombo Radyo Laoag ken ni Lero, inbatad na a ti akinkukua ti kotse ket maysa a Police Master Sergeant iti National Capital Region (NCR).
Inlawlawag ni Lero a nakikoordinar kadakuada ti nasao a police officer ken inbaga na nga inparenta na laeng ti lugan na kenni Melchor.
Kuna ni Lero a nakasagana a personal nga umay ditoy ciudad ti Laoag ti nasao a police officer tapno madalusan ti nagan na.
Inbalakad da met iti nasao a police officer nga agpila ti mosyon iti korte tapno maala na ti lugan na.
Mainaig iti daytoy, kuna ni Lero a manarimaan pay laeng ti panagimbestigar da no sadinno pay ti sabali a pagibagsakan koma ni Melchor kadagiti nakaad-ado a bitbit na nga illegal a droga gapu ta nasurok a 1-milyon a pisos laeng ti gatangen ti kadwa da a nagpammarang a poseur-buyer.
Immuna iti daytoy, inpakaammo ni Lero a maysa nga aldaw kalpasan ti pannakatiliw da ken ni Melchor ket inpila da a dagus ti kaso kontra kenkuana babaen iti inquest.
Innayon na a basar iti Intelligence Unit ket immuna a nakita ni Melchor ditoy ciudad ti Laoag idi 2018 ken 2019.
Maipalagip a natiliw ni Melchor iti Barangay 41, Balacad ditoy ciudad ti Laoag idi Hunyo 17 ita a tawen ken nakumpiskar iti ikot na ti nakaad-ado nga illegal a droga a mapatta-patta nga agbalor ti nasurok a 5.2-milyon a pisos.
