LAOAG CITY – Kumpirmado a maysa a granada ti nakita iti kanal iti likod a paset iti merkado publiko iti ili ti San Nicolas.
Ti inisyal nga impormasyon a nakalap ti Bombo Radyo Laoag, ti aglatlati nga hand grenade ket naipan iti ecobag ken naregreg iti kanal.
Basar iti PNP, ti nasao a granada ket mabalin pay a bumtak.
Ummuna iti daytoy, maysa a tricycle driver ti nakakita ken nagreport iti PNP ken naikoordenar iti EOD team ken dagus a nagturong met dagitoy iti nasao a lugar.
Basar kenni Mr. Ricardo Guillermo, ti nakakita iti granada, bayat nga ur-urnusen na idi bigat ti Sabado dagiti batbato a pagpagnaan da ket nakita na ti ecobag ken inukag na tapno maamoan ti linaon daytoy.
Nupay kasta, kunana a nagamak idi nakita na a granada ti linaon daytoy isut gapo na nga insubli na ken itay laeng bigat nga inbaga na iti presidente da.
Inlawlawag na a saan na a dagus nga inreport idi Sabado gapo iti panagamak na.
Mainaig iti daytoy, kuna ni Mr. Christopher Hernandez, presidente asosasyon dagiti traysikelan a posible a saan pay a nabayag a naibati ti nasao a granada.
Kabayatanna, agtultuloy ti imbestigasyon ti PNP ken ti pannaka-review ti CCTV iti lawlaw ti tiendaan.
