LAOAG CITY – Manamnama ti pormal panagsarita ti biktima ken ti suspek iti napasamak a kumusyon iti Brgy. 24 Sta. Monica iti ili ti San Nicolas.
Segun ken ni Barangay Kapitan Hilario Aurelio a ti rason ti saan a panagkinnaawatan dagiti duwa ket gapu iti naidanon a sao iti biktima a ni Jimmy Transfiguracion nga insawang ti suspek.
Kuna ti Kapitan a maipagarup a dinillaw ti suspek a ni Rene De Vera ti saan a makaay-ayo nga angot ti baboy ti biktima nga isu metten ti rason no apay a sinada ken sinidir ni Transfiguracion ti suspek.
Maipalagip nga apaman ti panangsada ti biktima iti suspek ket ditoy a napasamak ti riri agingga a pinang-ur ti suspek usar ti baseball bat ti ulo ti biktima iti sumagmamano a daras.
Insigida met a naitaray iti Governor Roque B. Ablan Sr. Memorial Hospital ti biktima para iti naan-anay a pannakatamingna ken iti agdama ket agpapalaingen daytoy.
Kabayatanna, natiliw met laeng ti suspek iti pagtaenganda iti Sitio 6, Brgy. 24 Sta. Monica iti ili ti San Nicolas ken narekobre ti baseball bat a maipagarup nga inusar ti suspek, ngem sumagmamano nga oras ket rimuar met laeng iti pagbaludan.
Mainaig iti daytoy, inpakaammu ti Kapitan a nasinged nga agpagayam ken agkaarruba dagiti dwa ken ita laeng nga adda napasamak a riri da.
Nagballaag pay daytoy iti publiko a liklikan kuma ti agidanon-danon ti sasao, no di ket napinpintas a pagsasaritaan a nasayaat.
