LAOAG CITY – Pimmusayen ti kutsero a nanguggor iti natay a kabalyo kalpasan a panagdinnungpar ti maysa a karwahe ken maysa a wing van truck iti Barangay 16 iti ili ti San Nicolas idi laeng kalman.
Daytoy ti kinumpirmaran ni Police Captain Ashley Cacayorin, ti Deputy Chief of Police ti PNP-San Nicolas.
Maipalagip a nabigbig ti nanguggor iti karwahe a ni Dominador Sahagun a residente ditoy ciudad ti Laoag idinto a ti nangiturong ti truck ket ni Ayken Ichinik, a residente iti Barangay 28 iti ciudad ti Batac.
Kuna ni Cacayorin a natay ni Sahagun bayat a matamtaming iti Mariano Marcos Memorial Hospital and Medical Center iti siudad ti Batac.
Innayun na a manamnama nga agsarita ti pamilya ti natay agraman ti driver ti wing van a karaman iti aksidente.
Immunan a naduktalan iti imbestigasyon dagiti otoridad nga agawid kuma ti driver ti truck ken agturong iti abagatan idi nadungpar na ti likodan ti karwahe rason a timmayok daytoy no sadinno ket nawara ti karwahe ken dagus a pimmusay ti kabalyo.
Nagsagaba ti sugat iti ulo ken nagduduma a paset ti bagi ni Sahagun idinto a ti driver ti truck ket saan a naan-ano.
Nagtalinaed iti kustodyar dagiti otoridad ti driver ti truck.
