LAOAG CITY – Inlawlawag ni Clarissa Currot, ti live-in partner ni Chris John Ancheta iti Barangay 44, Zamboanga ditoy ciudad ti Laoag ti sibubukel a pasamak sakbay a napasamak ti pammaltog no sadinno a ti suspek ket mismo a ti ama ti biktima.
Iti eksklusibo nga interview ti Bombo Radyo Laoag ken ni Currot, inbatad na nga immuna a kwinestyunaran ti ama a ni Richard Ancheta no apay a walo ribo a pisos laengen ti kwarta nga ig-iggaman ti anak na.
Naamoan a ti biktima ti pagipatpatuludan ti kwarta ti lola na nga ina ti ama na nga adda iti ballasiw taaw gapu ta daytoy ti matalek na.
Inbatad ni Currot a kalpasan a nailawlawag ti live-in partner na ti nakaipanan ti dadduma a kwarta ket inyawat na ti nabati kenkuana kalpasan na ket rimuar ti biktima.
Kuna na nga iti panagsubli ti live-in partner na ket nangngeg na a sinaludsud ti ama ti “apay bagkungen nak”, ket isungbat met ti biktima ti “apay koma bagkungen ka ket papang ka, saan ka kayat a bagkungen ka papangko”.
Innayon na a kabayatan ti panagsarsarita dagiti agama ket umasideg koma kadakuada ngem ditoy a nakita na ti panangbunot ti suspek ti paltog nga adda a mismo iti bag na no sadinno a ginandat ti biktima nga agawen ngem saan a nagballigi.
Gapu iti buteng ni Currot gapu ta saanna nga inpagarop nga adda ti paltog ti suspek ket nagtartaray a rimuar iti balay da ken napan iti karruba da ngem ditoyen a nakangngeg ti nagsasaruno a putok ti paltog.
Inpakaammo na nga iti pangsubli na kadwa na dagiti karruba na ket ditoyen a nakita da a nakadasay ti live-in partner na idinto a ti suspek nga ama na ket pimmanaw nga arigna awan ti napasamak babaen ti panaglugan na ti motorsiklo.
Inreport a dagus dagiti karruba na iti kwerpo ti pulisya ti napasamak ken iti panagresponde dagiti otoridad karaman ti City Health Officer a ni Doctor Joseph Adaya ket ditoyen nga indeklarar na a pimmusayen ti biktima.
Immunan nga inbaga ni Doctor Adaya nga umabot ti lima wenno nasursurok pay ti tama ti paltog ti biktima nge possible a ti tama na iti barukong ti nakatayan na.
Inadmitir ni Currot a nakainom ti arak ti live-in partner na ngem saan a nabartek.
Maladingitan unay ni Currot iti pannakatay ti live-in partner na gapu ta awanen ti katulungan na a mangpadakkel kadagiti annak na kangrunaan na ket masikog pay iti agdama.
Kabayatanna, inbatad ni Barangay Chairman Elmer Lorenzo iti Barangay 44, Zamboanga ditoy ciudad ti Laoag nga adda idi ti panagriri dagiti agama nga Ancheta gapu iti maipagarop a panagsao-sao ti ub-ubing, innem a bolanen ti napalabas.
Nupay kasta, naurnus na met laeng ti saan a nagkinnaawatan dagiti agama, ngem kayat idi ti ama a pagtalawen ti anak na gapu ta saanna a maisardeng ti panagin-inom na.
Inbalakad met ti kapitan iti ama nga Ancheta nga ikkan na ti gundaway nga agbalbaliw ti anak na ken no pagtalawen na daytoy ket awan met laeng ti sabali a papanan na.
Inpagarop ti kapitan nga awanen ti problema iti nagbaetan dagiti agama isut gapuna a nakigtot idi kalman kalpasan a naamoan na ti panangpalto-paltog ti ama nga Ancheta iti anak na a nagresulta ti pannakatay ti biktima.
Basar ken ni Kapitan Lorenzo, agmakatawen pay laeng nga agnanaed ti pamilya Ancheta iti barangay da gapu ta immuna a nagnaed da iti Brgy. 1 ken simmaruno iti Brgy. Bengcag ditoy ciudad ti Laoag.
Maipalagip a natay kalpasan a napaltu-paltugan ni Chris John Ancheta babaen met laeng iti ama na.
Agpapan maisursurat daytoy a damag ket manarimaan pay laeng ti imbestigasyon dagiti otoridad mainaig iti napasamak a pammaltog kabayatan ti panangbirbiruk da iti suspek.
