LAOAG CITY – Nagtalinaed iti kustodyar ti PNP Laoag ni Ammiel Luiz, agtawen ti 21, agtrabtrabaho kas call center agent, residente iti Barangay 11 ken subject iti naisayangkat nga anti-illegal drug buy bust operation iti General Luna St., Barangay 2 ditoy ciudad ti Laoag.
Daytoy ti inpakaamo ni PLt. Col. Rafael Lero, hepe ti PNP Laoag.
Mainaig iti daytoy, kuna ni Lero a namunganay ti pannakaiyuswat ti operasyon kenni Luiz kalpasan nga adda ti nangipadanon ti impormasyon nga adda dagiti ipost na iti social media ti maipagarup a nagani a marijuana.
Inbatad na a damo ni Luiz ti natiliw ken awan iti drugs watchlist.
Nu pay kasta, inpetteng na nga agtultuloy ti panagimbestigar da tapno maamoan nu asinno dagiti katransakyun na ken ti posible a supplier na ti maipagarup a marijuana.
Iti inisyal a panagimbestigar da ket maipagarup nga adda ti supplier ti suspek manipod ti sabali nga ili ditoy probinsya.
Maipalagip a natiliw ni Luiz kabayatanna ti kaadda na iti nasao a barangay para iti maipagarup a panagilakad na ti papeles iti panagsubli na kas Iglesia ni Cristo.
Nakumpiskar kenkuana ti dakkel a supot a naglaon ti maipagarup a marijuana nga agdagsen ti 10.7 a gramo, buy bust money a sangaribo a pisos ken ti motorsiklo na.
