LAOAG CITY – Napalusposanen ni Mr. Jayson Tungpalan, agtawen ti 30 ken residente iti Barangay Madiladig ditoy ciudad ti Laoag a nangkugtar iti namindua a daras ti ima ti asawa na gapu iti nakaro a pungtot na.
Daytoy ket gapu ta saanen nga agipila pay ti reklamo ti asawa na kontra kenkuana.
Maipalagip a dumawat ti 100 a pisos ti baket na ngem awan ti naited na gapu ta saan pay a nagsweldo.
Gapu iti daytoy, maipagarop a nakapungtot ti asawa na ket inbakal-bakal na dagiti sumagmamano nga alikamen da iti kusina.
Inpetteng ni Tungpalan nga ub-ubbaen na ti anak da nga agtawen ti maysa idi agibakal-bakal ti asawa na kadagiti alikamen da isut gapuna a saan nan a nalapdan ti rikna na ket nakugtaran na ti namindua a daras ti ima ti babai.
Immuna a naipakustodyar ti lalaki iti PNP Laoag.
